منتديات الفنون
[
عزيزي الزائر / عزيزتي الزائرة يرجي التكرم بتسجبل الدخول اذا كنت عضو معنا
او التسجيل ان لم تكن عضو وترغب في الانضمام الي اسرة المنتدي
سنتشرف بتسجيلك
شكرا
ادارة المنتدي


فنون بلا حدود
 
الرئيسيةالرئيسية  اليوميةاليومية  مكتبة الصورمكتبة الصور  س .و .جس .و .ج  بحـثبحـث  الأعضاءالأعضاء  المجموعاتالمجموعات  التسجيلالتسجيل  دخولدخول  

شاطر | 
 

 حكايات الجدة برؤية جديدة

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
سندريلا
عضو
عضو
avatar

عدد الرسائل : 78
العمر : 24
نقاط : 13
تاريخ التسجيل : 06/01/2009

مُساهمةموضوع: حكايات الجدة برؤية جديدة   الأحد يناير 11, 2009 11:03 am

بعد ما إتأكدت من إن الفكرة مش موجودة في اي منتدى تاني
وأن الموضوع جديد تماما ما حدش كتب فيه قبل كده
وأني مش في كامل قواي العقلية وده الأهم
قررت إني أقدملكم الموضوع الحصري ده
وهوه حكايات الجدة برؤية جديدة 2008/2009

واي حد يحب يشارك معايا في الموضوع من اللي خيالهم واسع
ومعاهم شهادة يعامل معاملة الأطفال
يتفضل يكتب هاشكره وارحب بيه جدا





ها نبدأ طرقـعة
مــــاشي


بسم الله الرحمن الرحيم


الحكاية الأولى : نورا والأقزام السبعة

صلوا على النبي

في يوم من زماننا هذا وفي عصرنا هذا حسب التوقيت المحلى لمدينة القاهرة

قعدت ام نورا قبل ما تجيب نورا جمب الشباك تبص على البنين والبنات وهما بيلعبوا في سكات
وقالت يا عيني عليكي يا نرمين ما خلفتيش حتت عيل يقولك يا ماما ولاه نافع ادوية ولاسفر بره
مفيش قدامي غير طفل الأنابيب وندر عليا لو كان ولد لأسميه شادي ولو بنت اسميها نورا
بس هوه المحروس جوزي يفك الوديعة ويديني الفلوس وأنا اعمل العملية طوالي , ياما نفسي
في حتت عيل يا ناس

ولما كان الزن على الودان امر من السحر , وافق ابو نورا انه يفك الوديعة ويخسر الفوائد
وخدت نرمين الفلوس كلها وعملت العملية والحمد لله نجحت واكدلها الدكاترة انها ممكن تخلف دالوقتي
بإذن الله .

بعد مرور تسعة أشهر
وضعت نرمين طفلة جميلة , بيضاء زي اللمبة النيون
شعرها اسود وناعم ولاه بتوع اعلانات صانسلك وبانتين
وخدودها حمرة زي الجيلي بالفراولة

مرضت نرمين مرضاً شديداً ,
ولم ينجح الأطباء في علاجها , ولم يأذن الله بشفائها
فماتت...
وحزن اونكل فؤاد (ابو نورا) أشد الحزن لموت زوجته المخلصة , واصبح وحيداً , كما أن نورا اصبحت
بلا أم تحنو عليها وتربيها وتحبها


اضطر أن يتزوج فؤاد مرة اخرى , واختار واحدة من اللي اعلاناتهم في الجرايد
بيضاء ملفوفة القوام وتقدس الحياة الزوجية , بعد ان فشلت محاولاته في الارتباط بأحدهم
عن طريق الsms اللي بيبعتها من ميلودي


اختار زوجة جميلة , لكنها كانت متكبرة وإنفة وطالعة فيها , بتحب نفسها وما تحبش حد يكون اجمل منها
وكان عندها مراّية سحرية اشترتها من دجال في الدقي تنظر فيها وتسألها يا مرايتي يا مرايتي !!!
في حد من البنات بتوع الكليبات ولاه بتوع روكسي ووسط البلد اجمل مني ؟


ترد عليها المراّية : يعنى لو حد شافك يا هابلة بتكلمي مراية يقول عليكي اتجننتي
اتصلي ب880 من اي محمول واسأليهم
ترد عليها البنت بتاعت الكول سنتر :
اطمني بعد ما عملتي عملية تجميل في أنفك , وفتحتي بشرتك انتي دالوقتي
اجمل الجميلات تك ..تيت تيت تيت
يتكرر هذا المشهد كل يوم واحيانا اكثر من مرة في اليوم إلى أن..

ترد عليها البنت بتاعت الكول سنتر :
انت ما وراكيش شغلانة غيرنا
طب ايه رأيك بقه إن في نورا أحلى منك واجمل منك بكتير جدا
تك..تيت تيت تيت

ايه..!!
احلى واجمل منى وبكتير جدا
لازم اعرف مين نورا ده
اكيد قصدها على نورا بنت فؤاد ما البت كبرت واحلوت
انا لازم أخلص منها علشان ما يبقاش في حد أحلى ولا أجمل مني
بس أخلص منها إزاي ؟؟
أنا ابعتها مع عبده السواق , يخش بيها زقاق , يخلص عليها بدري , ويجيب من اترها عندي

راحت البنت المسكينة مع السواق , وهيه فاكرة إنه هايفسحها في جنينة الحيوانات
أخدها لمجمع التحرير ولففها فيه السبع لفات
علشان يتوّوها عن البيت
وقالها يا نورا :
أنا قبضت من زوجة ابوكي علشان ااقتلك , تدفعي إنتى كام رشوة واسيبك ؟؟
البنت يا عيني اتخضت وقعدت تصرخ .
عبده السواق :
بس يا بت لأخبطك في عمود , إنت مش معاكي موبايل n 95 هاتيه دالوقتي واسيبك في سكات
نورا:بس مايا صاحبتي هاتكلمني كمان شوية عشان تحكيلي اللي حصل في ساندي بل على كوكب زمردة
عبده الندل يخطف موبايل نورا من يدها وينتزع الحلق من أذنها ويسير مبتعدا عنها ويتركها ليعود
لزوجة أبيها ويقدم لها الحلق وينال باقي مبلغ الأتفاق
زوجة الأب لا تملك نفسها من فرط السعادة:
خلصت من نورا ورجعت اجمل واحدة في الكون
واخذ صوت ضحكة حمارة انطلقت منها يتردد صداها في الارجاء



اما نورا المسكينة فتاهت في أروقة المجمع , ونزلت تاهت اكتر في الشوارع وحتى لو عرفت ترجع
فزوجة ابيها لها بالمرصاد ,
جلست نورا على الرصيف تبكي بشدة وارتفع صوتها بالنحيب مما جذب المارة إليها
واخذ كل منهم يبذل ما يستطيع أن يجود به ويتركوها وينصرفوا
يقترب منها غلام صغير ويسألها : أنتي شغالة مع اسطى مين يا بت ؟
نورا تنظرإليه وعينيها مغرقة بالدموع : أنا مش بت
الغلام : طب يا ست الحسن روحي اسرحي في المترو عشان هنا منطأتي
نورا : أنت كمان عايز تخلص مني , عايزني اسرح في المترو اللي بقه يخبط في الرصيف
الغلام : خلاص عايزة تاكلي عيش هنا يبقى الحسنة اللي تاخديها هاتتقسم علينا بالنص
نورا وهي تبكي : بس انا مش عايزة اسرح , انا عايزة اكل وانام وماعرفش هاروح فين
الغلام : خلاص تيجي معايا العشة , عايش فيها انا واخواتي السته , تدبرلنا المطرح واحنا
نأكلك ونشربك وتنامي في حته
نورا وافقت ..



وبكده خلص الجزء الأول من حكاية : نورا والأقزام السبعة
جيلاتي ستيك , وحمام بالفريك , حلوة يا كتاكيت؟
واللي عجبته الحكاية , يبقالي عنده بونبوناية

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
جوهرة
عضو
عضو
avatar

عدد الرسائل : 83
نقاط : 0
تاريخ التسجيل : 06/01/2009

مُساهمةموضوع: رد: حكايات الجدة برؤية جديدة   الأحد يناير 11, 2009 12:08 pm

ههههههههههههه فكره كثيير جميلة اختي
مشكورة
تحياتي
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
عصفور الجنة
المدير العام
المدير العام
avatar

عدد الرسائل : 136
نقاط : 165
تاريخ التسجيل : 20/12/2008

مُساهمةموضوع: رد: حكايات الجدة برؤية جديدة   الأحد يناير 11, 2009 7:40 pm


طيب يا ستى انا عجبتنى الحكاية فين بقى البونبونى
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://alfnoons.yoo7.com
 
حكايات الجدة برؤية جديدة
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات الفنون :: «®°·.¸.•°°·.¸.•°™ المنتدى الادبى ™°·.¸.•°°·.¸.•°®» :: فردوس القصص والروايات-
انتقل الى: